高質西班牙饗宴 *QMO*

船街既高質西班牙菜 非常好既體驗 值得一試！

3x3+3 Pairing Menu $468

  非常有特色同值得一試既套餐 三道菜會配番三款selected酒

頭盤揀左Iberia Pork Shoulder “Tonnato” Tonnato其實好似吞拿魚沙律醬咁 味道方面唔會太濃 襯托出豬肩肉既肉香 配左好醒胃既西班牙香檳Cava氣泡酒 係一個好好既start up

香煎鴨肝配甜蘋果蓉 清新奢侈既享受

鴨肝甘香濃郁 震撼每一個味蕾 油而不膩 入口即溶 不過火煎菜沙律個人覺得味道唔係特別夾 餐酒係Teatinos Moscatel甜酒 襯番呢一道甜甜地既菜式

主菜火雞扒肉質比雞結實 底層有芝士 味道更加濃郁 蘋果絲非常清甜 配菜煙肉薯仔亦都好惹味 Bordeaux紅酒醇厚芳香 好易入口 


 地址：灣仔船街4號地舖

只應天上有 *鮨文*

貨真價實既廚師發板日本料理 對廚師有100%既信任 任由佢以獨特既烹調手法煮出唔同既菜式 可以講得上係驚喜萬分

先黎一杯sake打開美味旅程序慕

其中既一道毛蟹料理

 毛蟹正值盛產期 多肉又多膏 師傅以巧手將蟹肉拆出 鮮味程度真係震撼味蕾
一路食一路聽師傅講解 真係增長左唔少對日本菜式既知識

肥美既大拖羅壽司 甘甜肥美 香味衝擊成個口腔 油脂澎湃入口即溶 真係冇得頂

三文魚子壽司  從未食過咁新鮮既三文魚子 有幾新鮮？師傅即席示範 好似彈彈波咁樣彈得起 完全冇平時唔新鮮果種腥味 只係食到鮮甜既海鮮味 真讚！

全晚既亮點 海膽杯 媽咪呀真係尖叫左出黎！ 太精美既一道料理 一板海膽先可以做三杯 可想而知海膽份量勁量級 鮮甜既味道達至頂點 同牡丹蝦互相輝映 太正了！

拖羅手卷 冇得輸！ 入口甘香 溶化係舌頭上 太美味了

甜點有威士忌哈蜜瓜 出奇地夾 無懈可擊


地址：元朗仁樂坊5號利發大廈地下E 舖

中泰合璧 *巷卅八*

 

北角新開既泰國菜餐廳 但係入邊嘅裝飾竟然有少少港式 幾特別

馬拉盞通菜非常惹味 微微辣非常吊胃口 好味！
而且份量十足都幾大碟架

噴靚咖哩紐西蘭羊架 $138


  香氣撲鼻既鐵板羊架 聽到聲都令人興奮 香料十足 
味道好豐富 羊架好鮮嫩多汁 非常可口 咖喱汁香濃到不行 堅正

豬脾煮得非常腍 入口即溶 豬皮滑溜到不得了 肥瘦亦都幾balanced 配上平時打冷食到既酸汁 真係好開胃

不過甜品方面就比較遜色 比起正宗嘅泰式口味有分別




  地址：北角城市花園道233號地舖

滿分驚喜 誠意之作 *炉端金*

午市日式放題 $185

一直好期待既日式餐廳
果然食物質素同服務都係一流 誠意十足 而且好抵食

刺身拼盤加入乾冰效果非常討好
刺身好新鮮 款式都幾多 甜蝦仲係原隻上架

其中一款必點既壽司 海膽花之戀 鮮味十足 
真係勁正勁好味 貼心地飯量適中 可以一食再食

呢度既串燒料理亦都相當值得一讚
因為食材新鮮 而且即叫即燒 款式又多 真係令人回味無窮

天婦羅炸漿夠晒薄 好脆好香口 非常美味

另加$38 就可以嘆埋爐端燒

食材新鮮肉質鮮嫩 有雞翼有豬肉有牛肉
牛肉非常靚 油花足 肉味濃郁

甜品仲有movenpick雪糕 超正！
另外仲有布甸等等嘅甜品架  



地址：尖沙咀金馬倫道33號地舖

老蘭中的日本風情 *左近*

黎到蘭桂坊除左飲野都有好野食 呢一款泡沫拉麵係呢一間拉麵店既主打 午市限定係柚子口味 夜晚就係黑松露口味 所有食材都係有日本師傅親自主理架

柚子鹽豬骨泡沫拉麵 $148   巴西豬肩肉以櫻花木冷熏 變成玫瑰叉燒 肉質好嫩 加上高知縣柚子做成既泡沫 果味好清新同特別 同叉燒味道好夾

而隻溏心蛋係超美味 先以4日醃製再煮到半熟  麵既份量仲好多 

再配埋日本風味餃子  皮薄餡靚 調味得宜 真係不得了！

呢度仲有呢支極級嘅黑烏龍茶 可以消脂解膩架   地址：中環蘭桂坊榮華里19號地下B舖